Գալուստ Սահակյանի գլխավորած պատվիրակությունը հանդիպել է Հերոշիմայի քաղաքապետի հետ

ՀՀ ԱԺ նախագահ Գալուստ Սահակյանի գլխավորած պատվիրակությանը, որի կազմում են ՀՀ ԱԺ պատգամավորներ Վահրամ Բաղդասարյանը, Ռուզաննա Մուրադյանն ու Սամվել Ֆարմանյանը, ՀՀ արտաքին գործերի նախարարի տեղակալ Արմեն Պապիկյանն ու Ճապոնիայում ՀՀ արտակարգ եւ լիազոր դեսպան Հրանտ Պողոսյանը, փետրվարի 1-ին ընդունել է Հերոշիմայի (Ճապոնիա) քաղաքապետ Կաձումի Մացուին: Քաղաքապետը շնորհակալություն է հայտնել հայկական պատվիրակությանը Հերոշիմա այցելելու համար եւ վստահեցրել, որ թեեւ Հերոշիմա եւ Երեւան քաղաքների համագործակցությունը գտնվում է պատշաճ մակարդակում, այդուհանդերձ ինքը պատրաստ է առավել խորացնել այն, հատկապես, որ Երեւանն ընդգրկվել է «Քաղաքապետեր հանուն խաղաղության» կազմակերպության կազմում: Քաղաքապետ Կաձումի Մացուին հույս է հայտնել, որ Հայաստանի այլ քաղաքներ եւս կանդամագրվեն այդ կազմակերպությանը:

Մաղթում եմ բոլորին հույս՝ որը երբեք չերերա, լույս՝ որը երբեք չմարի, սեր՝ որը երբեք չվերջանա

Նօրաթերթ․am-ի հյուրն է Ազգային ժողովի պատգամավոր, ՀՀԿ խմբակցության անդամ Ռուզաննա Մուրադյանը:

-Ձեր ելույթներից մեկում անդրադարձել եք Ջոհարիի՝ <Պատուհանի մոդել>-ին, ըստ որի ինքնաճանաչման նպատակով նա մարդուն նմանեցնում է 4 փեղկանի պատուհանի: 1-ին փեղկը բաց, տեսանելի վիճակն է, որով մարդը ներկայանում է այնպիսին, ինչպիսին կա: 2-րդը՝ կույր փեղկն է՝ ուրիշների համար բաց, իր համար՝ փակ, 3-րդը՝ թաքնված մարդն է՝ իր համար բաց, մյուսների համար փակ, 4-րդը՝ անծանոթ, չբացահայտված մարդն է՝ փակ և անհասանելի իր և մյուսների համար: Թվարկածներից ո՞ր տեսակն է Ձեզ բնորոշ:

-Իմ տեսակը ավելի շատ կնմանեցնեմ պատուհանի բաց փեղկին: Շփումների մեջ գերադասում եմ լինել բաց և անկեղծ, այդ մասին կարող են վկայել նաև ինձ ճանաչողները: Իհարկե, հասարակական-քաղաքական պաշտոն զբաղեցնելը և տարբեր հասարակական ոլորտներում ակտիվ մասնակցություն ունենալը պատասխանատու գործ է, սակայն ամեն ինչ կարելի է հաղթահարել և պատվով կատարել, երբ հավատում ես քո ուժերին: Երբ զբաղեցնում ես քաղաքական պաշտոն, ավելի շատ է հասարակության ուշադրությունը կենտրոնացված քեզ վրա, և մեծ է պատասխանատվությունը ժողովրդի առաջ, որը և քեզ պարտավորեցնում է անել աշխատանքդ քո ունեցած հնարավորությունների առավելագույնի չափով: Որպես քաղաքական և հասարակական գործիչ իմ գործունեությունը միշտ բաց է եղել հանրության համար: Պետք է բաց լինել հասարակության համար, որ հնարավորություն տաս ճանաչել քեզ: Հենց այդ նպատակով իմ անձնական բլոգում փորձել եմ ստեղծել մի հարթակ, որը հաշվետվության յուրահատուկ ձևաչափ է իրենից ներկայացնում, և տեսանելի է դարձնում իմ քաղաքական, հասարակական գործունեությունը:

Իմ բլոգի հասցեն է՝ http://muradyanruzanna.blogspot.am:

-Դուք որպես ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովի անդամ ինչպե՞ս եք գնահատում նշված ոլորտների ներկա վիճակը:

-Գլոբալ առումով մենք ապրում ենք փոփոխությունների ժամանակաշրջանում, և այդ համատեքստում կրթությունն անընդհատ բարեփոխումների կարիք ունի։ Այս գործընթացը ոչ միայն Հայաստանում է, այլև արդիական է բոլոր երկրներում։ Աշխարհի մարտահրավերներով պայմանավորված, տարբեր ոլորտներում ցնցումներ անընդմեջ լինում են, որոնք կանխելու, մեղմելու, շրջանցելու համար գնահատվում և հաշվարկվում են ռիսկերը։ Կարծում եմ, մեր կրթության և գիտության նախարարությունը ևս ունի մատնանշված հնարավոր ռիսկերը և զարգացման ուղղությունները, ինչի հիման վրա էլ կառուցում է իր քաղաքականությունը։

Սրա հետ մեկտեղ, պետք է հիշեցնեմ վարչապետի խոսքը կրթության մասին, որում նա կարևորեց հեռահար դասընթացների վարումը։ Կարծում եմ, որ սա պետք է առանցքային ուղղություն դառնա մեր կրթության զարգացման պետական ծրագրում։ Այսօր տարբեր մարզերում, հեռավոր գյուղերում չունենք պատշաճ քանակի մասնագետներ բոլոր առարկաների գծով։ Հեռահար դասավանդումը կարող է լրացնել այդ բացը։

Շատ կարևոր է, որ այսուհետ ուշադրություն է դարձվելու ձեռնարկատիրական կրթությանը, ինչը կնպաստի երեխաների, ինչու ոչ, նաև մանկավարժների ստեղծագործական մտածողության ձևավորմանը։ Այդպիսով մենք կնպաստենք, որ նոր սերունդը մեծանա ոչ միայն սպառողի, այլև ստեղծողի, ստեղծածը իրացնողի և դրանից ստացված եկամուտը նոր ստեղծարար մտքի մեջ ներդնողի մտածողությամբ։

Այս գործընթացը եվրոպական առաջատար կրթական ծրագրերում ընդգրկված է։ Սա կրթության ոլորտում մեր կառավարության նոր ծրագրերից է։

Ասեմ, որ այս տարի ոլորտի զարգացման հարցում պետության ուշադրության կենտրոնում է նաև միջին մասնագիտական կրթությունը ։ Սա շատ կարևոր մոտեցում է, ինչը հեռանկարում կնպաստի տնտեսության զարգացմանը, քանի որ գիտելիքահեն տնտեսությունը կարևոր օղակներից մեկն է։ Կրթությունն այն կարևոր ոլորտն է, որտեղ հնարավորինս քիչ պետք է լինեն ցնցումները։ Դրա հետ մեկտեղ, մենք չենք կարող սկսած բարեփոխումները ձախողել՝ խոսքը մեր երեխաների, մեր երկրի ապագայի մասին է։

-Հանրության շրջանում առկա է իր և երկրի ապագայի հանդեպ անվստահությունն ու անորոշությունը: Իշխանությունն այն վերականգնելու համար ի՞նչ քայլեր պետք է անի:

-Այս փոփոխությունների ժամանակաշրջանում, երբ դեռևս լուծված չեն նախորդ մարտահրավերները, անհրաժեշտ է ամեն ինչի մեջ ոչ թե խնդիրներ, այլ նաև լուծումներ և ձեռքբերումներ տեսնել: Դա հնարավորություն կտա աշխատանքն առավել արդյունավետ դարձնել: Իշխանությունը պատրաստակամ է բոլորին տալ հավասար հնարավորություն մասնակցելու երկրի կառավամանը, դրա մասին են վկայում վերջերս կատարված օրենսդրական փոփոխությունները, որով յուրաքանչյուր շահագրգիռ անձ կարող է ունենալ իր մասնակցությունը երկրի կառավարման գործում: Իսկ այս տարիների ձեռքբերումներից են Սահմանադրության փոփոխությունները, ընտրական օրենսգրքի փոփոխության վերաբերյալ իշխանության, ընդդիմության ու քաղաքացիական հասարակության փոխհամաձայնությունը:

-Ըստ Ձեզ, հայ կնոջ կերպարն ու հոգեբանությունը վերջին 25 տարում որքանո՞վ է փոխվել:

-Եթե գանք մեր պատմության խորքերից, ապա կտեսնենք, որ տարբեր դարաշրջաններում կանայք կարևոր դերակատարում են ունեցել մեր երկրի կայացմանն ու զարգացմանն ուղղված տարբեր գործընթացներում: Կնոջ դերը թե՛ ընտանիքում և թե՛ հասարակության մեջ միշտ էլ բացառիկ ու յուրօրինակ է եղել: Յուրաքանչյուր հասարակական, քաղաքական, մշակութային ոլորտ և ժամանակաշրջան մշակում է իրեն բնորոշ քաղաքական մշակույթ, որի փոփոխության ժամանակ տեղի է ունենում բոլոր արժեքների, նորմերի և դրույթների, մարդկանց աշխարհաճանաչման ողջ համակարգի վերանայում: Այսօր Հայաստանում կնոջ դերը հասարակական-քաղաքական ոլորտում ընկալվում է այլ կերպ: Իսկ դա արտահայտվում է նրանով, որ հասարակական-սոցիալական կյանքում բավական մեծ նշանակություն ունի կինը` իր անհատականությամբ, հմայքով, մայրական քնքշանքով և կանացի հատուկ բնավորությամբ, նպատակասլացությամբ:

Երիտասարդ աղջիկներն ու կանայք այսօր ավելի լիարժեք են դրսևորում իրենց մտավոր ներուժը, կրթության ու անձնական ուժեղ որակների շնորհիվ կյանքի գրեթե բոլոր ոլորտներում հասնում մեծ հաջողությունների:

-Քաղաքականությամբ և հանրային գործունեությամբ զբաղվող կինը, այնուհադերձ ամուր հենարանի կարիք ունի: Ո՞րն է Ձեզ համար այդ հենարանը:

-Ամենամեծ հենարանն իմ ընտանիքն է, ով ամեն հարցում ինձ օգնում և աջակցում է: Զբաղվածությանս պատճառով շատ ժամանակ չեմ կարողանում անցկացնել երեխաներիս, թոռնիկներիս հետ, բայց փոքր հնարավորության դեպքում իսկ փորձում եմ լրացնել այդ բացը: Շնորհակալ եմ ընտանիքիս անդամներին, ովքեր ըմբռնումով են մոտենում և միշտ աջակցում ինձ:

-Ի՞նչ եք մաղթում հայ կնոջը, և առհասարակ, հայ ժողովրդին 2017 թվականին:

-Ինչպես ասել է Խրիմյան Հայրիկը՝ ժողովուրդը եթե լուսավորվում է` իր լույսն ընտանեկան ճրագից է առնում: Հայ կինը այդ ճրագը պահողն է: Մաղթում եմ բոլորին հույս՝ որը երբեք չերերա, լույս՝ որը երբեք չմարի, սեր՝ որը երբեք չվերջանա

Անուշ Ներսիսյան

Նյութի աղբյուր՝ http://noratert.am/ռուզաննա-մուրադյան-մաղթում-եմ-բոլորի/

Ռուզաննա Մուրադյանը` խորհրդարանական իր գործունեության մասին Դե Ֆակտո» N127 (2016թ.)

ՀՀ Ազգային ժողովի «Հանրապետական» (ՀՀԿ) խմբակցության պատգամավոր, մանկավարժական գիտությունների թեկնածու Ռուզաննա Մուրադյանն այսօր քաղաքական դաշտում ակտիվ գործունեություն է ծավալում: Խորհրդարանում աչքի է ընկնում իր պարտաճանաչությամբ, խոսքով ու վարքագծով: Հենց նրա հետ առիթ ունեցանք զրուցելու իր օրենսդրական եւ մանկավարժական գործունեության մասին:

-Տիկի՛ն Մուրադյան, 2012թ-ին ԱԺ պատգամավոր եք ընտրվել ՀՀԿ համամասնական ցուցակով, ինչպե՞ս եք գնահատում ԱԺ-ում այս տարիների ընթացքում օրենսդիր ոլորտում Ձեր կատարած աշխատանքը: 

-Բնույթով լինելով ակտիվ անձնավորություն` ցանկացած գործի մեջ փորձում եմ հասնել հնարավորինս առավելագույն արդյունքի: Իսկ պատգամավորի աշխատանքը էլ ավելի պատասխանատվություն է ենթադրում, քանի որ պետք է փորձես արդարացնել այն բոլոր սպասումները, որ քեզանից ակնկալում է քո քաղաքական թիմը և, իհարկե, ժողովուրդը:

Ինչպես նշեցիք՝ պատգամավորական գործունեությունս սկսել եմ 2012թ.-ից, սակայն մինչ այդ էլ ակտիվորեն զբաղվել եմ հասարակական-քաղաքական գործունեությամբ՝ արդեն 10 տարի լինելով ՀՀԿ կանանց խորհրդի անդամ: 2006թ.-ից ղեկավարում եմ ՀՀԿ կանանց խորհրդի գաղափարաքարոզչական հանձնախումբը, որի գործունեության շրջանակներում Կանանց խորհրդով նախաձեռնում ենք տարբեր միջոցառումներ, քննարկումներ, սեմինարներ, դասընթացներ մարզերի տարածքային կազմակերպությունների ՀՀԿ կանանց ակտիվի հետ կանանց ներուժի զարգացման նպատակով կուսակցության գաղափարախոսության տարածման, ՀՀ կուսակցության ծրագրի և կանոնադրության, հիշարժան տարեթվերի, ազգային ինքնության պահպանման, հիմնարար արժեքների, հայ ընտանիքի, ազգային տոների և ավանդույթների և այլ թեմաներով:

Երբ ընտրվեցի ԱԺ պատգամավոր, սկսեցի ուսումնասիրել տարբեր երկրների քաղաքական գործիչների գործունեությունը: Ժողովրդավար երկրներում պատգամավորների շփումը իրենց ընտրողների հետ ոչ միայն սահմանափակվում է հանդիպումներով և քննարկումներով, այլև տարբեր սոցիալական ցանցերի և առցանց հարթակների միջոցով՝ անմիջական կապ ստեղծելով և հաղորդակցվելով հանրության հետ: Գործունեությունս ավելի բաց և թափանցիկ դարձնելու նպատակով՝ ստեղծեցի անձնական բլոգ muradyanruzanna.blogspot.am հասցեով, որը կարծես հաշվետվության յուրօրինակ ձևաչափ է տարիների ընթացքում կատարված աշխատանքի: Բլոգում ներկայացված են իմ բոլոր ելույթները, Ազգային ժողովում բարձրացված հարցերը, տարբեր լրատվամիջոցներին տրված հարցազրույցները, մամլո ասուլիսները և այն օրենսդրական նախաձեռնությունները, որոնց հեղինակ կամ համահեղինակ եմ եղել: Այս հարթակը շատ լավ հնարավորություն է տալիս մարդկանց ծանոթանալու իմ գործունեությանը և անմիջական կապ ստեղծել ինձ հետ` ուղղելով իրենց հուզող հարցերը: Նույն նպատակին է ծառայում նաև «Ֆեյսբուք» սոցիալական ցանցում իմ անձնական էջը, որի միջոցով ստանում եմ բազմաթիվ քաղաքացիների դիմումներ, հարցեր, նրանց կողմից բարձրացված խնդիրներ և փորձում եմ աջակցել դրանց լուծմանը: Շատ խնդիրներ փորձել եմ բարձրացնել նաև մամուլի տարբեր ակումբներում կազմակերպած ասուլիսներին և դեբատներին ու լուսաբանել հանրությանը մտահոգող հարցերն ու խնդիրներ:

Այս տարիների ընթացքում սերտ համագործակցելով հասարակության տարբեր ներկայացուցիչների հետ՝ հանդես եմ եկել մի շարք օրենսդրական առաջարկություններով ոչ միայն կրթության, այլ նաև վարչական, քաղաքացիական, բնապահպանական, առողջապահական, սոցիալական, մշակութային և այլ ոլորտների բարելավման նպատակով:

-Դուք հանդիսանում եք ԱԺ Գիտության, կրթության, մշակույթի, երիտասարդության և սպորտի հարցերի մշտական հանձնաժողովի անդամ: Որպես կրթության ոլորտի մասնագետ՝ որքանո՞վ են ոլորտի խնդիրները արդյունավետ լուծում ստանում Ձեր միջոցով:

-2011թ-ից ղեկավարելով «Դպրոց-կենտրոնների միություն» իրավաբանական անձանց միությունը, որի անդամներն են ՀՀ տարբեր մարզերի դպրոցներ, այդ ցանցի գործունեությունը հնարավորություն է տալիս ինձ անընդհատ շփվելու քաղաքային, գյուղական, սահմանամերձ դպրոցների հետ, խորությամբ ծանոթանալու մանկավարժի, ծնողի, սովորողների հետ առնչվող ինչպես կրթական, այնպես էլ տարբեր ոլորտների խնդիրներին: Շատ կարևոր էր, որ հաջողվեց ստեղծել ակտիվ համագործության դաշտ ՀՀ բոլոր մարզերի դպրոցների և մանկավարժական համակազմի միջև, որի շրջանակներում կազմակերպվում են սեմինարներ, հանդիպումներ, քննարկումներ: Այս ցանցը շատ լավ հարթակ է հաճախ հանդիպելու մանկավարժների հետ, տեղերում ծանոթանալու տարբեր մարզերում առկա խնդիրներին ոչ միայն կրթական, այլև սոցիալական, առողջապահական, իրավական և այլ ոլորտներում: 

Դասավանդելով նաև Երևանի պետական համալսարանում` մշտապես առնչվում եմ բարձրագույն կրթության ոլորտի խնդիրների հետ: Դիմում-նամակներով ինձ դիմում են բազմաթիվ քաղաքացիներ՝ բարձրացնելով տարբեր խնդիրներ, որոնք ներկայացնում եմ տարբեր գերատեսչություններին կամ խնդիրների լուծումը փորձում եմ տալ համապատասխան օրենսդրական նախաձեռնություններով:

-Դուք Ձեր գործունեությունը սկսեցիք շատ ակտիվ, այն գնահատեց նաև parliament monitoring անկախ կայքը՝ Ձեզ ընդգրկելով կայքի ամենաակտիվ պատգամավորների տասնյակում: Այս տարիների ընթացքում էլ միշտ աչքի եք ընկել Ձեր ակտիվ գործունեությամբ քաղաքական ոլորտում: Որպես կին քաղաքական գործիչ՝ ո՞րն է կյանքի և հաջողության Ձեր բանաձևը:

-Կարծում եմ, որ կատարելության ձգտելու, անընդհատ սովորելու և աշխատանքի մեջ հոգի դնելու գործելաոճը ապահովում է հաջողության հասնելու ճանապարհը: Իմ աշխատանքում ցանկացած խնդիր փորձում եմ դիտարկել ոչ թե դժվարությունների, այլ հնարավորությունների տեսանկյունից: Իմ կարծիքով` յուրաքանչյուր դժվարություն մի նոր հնարավորություն է գործը առաջ տանելու, զարգացման նոր աստիճանի հասնելու և բարձրացնելու քո պատրաստվածության մակարդակը: 

Եվ ըստ իս` հաջողությունն այն է, երբ պատրաստվածությունդ հանդիպում է հնարավորությանը:

Հարցազրույցը՝ Սեդա Գասպարյանի

 

http://www.df.am/news/2481/ruzanna_muradyan_127.html#.WHFjoJBAiqE.facebook