ՀՀ ԴՊՐՈՑՆԵՐՈՒՄ ԿՐԵԴԻՏԱՅԻՆ ՀԱՄԱԿԱՐԳԻ ՆԵՐԴՐՄԱՆՆ ՈՒՂՂՎԱԾ ՀԱՆԴԻՊՈՒՄ.

2014 թվականի Օգոստոսի 20-ին «Դպրոց-կենտրոնների միություն» իրավաբանական անձանց միության գրասենյակում տեղի ունեցավ հանդիպում-քննարկում՝ ուղղված ՀՀ ավագ դպրոցներում կրեդիտային համակարգի ներդրմանը: Հանդիպումը կայացավ «Դպրոց-կենտրոնների միություն» ԻԱՄ-ի նախագահ Ռուզաննա Մուրադյանի, ԿԳՆ հանրակրթության վարչության նախադպրոցական և միջնակարգ կրթության քաղաքականության մշակման և վերլուծության բաժնի պետ Սյուզաննա Մակյանի, Երևանի 198 ավագ դպրոցի տնօրեն Արտաշես Թորոսյանի և այլ տնօրենների մասնակցությամբ: Այս հայեցակարգի շուրջ քննարկումների արդյունքում դպրոց-կենտրոնների տնօրենները հանդես եկան առաջարկություններով, որպեսզի հայեցակարգը նախապատրաստվի և ներկայացվի կառավարության հաստատմանը:

Սեյրան Օհանյանն այցելել է զինվորական հոսպիտալ․ Նորայր Քամալյանին հանձնվեց նախագահի պարգևած Արիության մեդալը

ՀՀ պաշտպանության նախարար Սեյրան Օհանյանը, ՀՀ Ազգային ժողովի նախագահի տեղակալ Հերմինե Նաղդալյանը և ԱԺ պատգամավորներ Ռուզաննա Մուրադյանը, Հեղինե Բիշարյանն ու Կարինե Պողոսյանը օգոստոսի 5-ին այցելել են Կենտրոնական կլինիկական զինվորական հոսպիտալ:

Այցելության նպատակը հակառակորդի կողմից վերջին օրերին հրադադարի ռեժիմի խախտման տարբեր դեպքերի ընթացքում հրազենային վիրավորումներ ստացած և հոսպիտալում ապաքինվող զինծառայողներին տեսակցելն էր: Սեյրան Օհանյանը, Հերմինե Նաղդալյանը, Ռուզաննա Մուրադյանը, Հեղինե Բիշարյանն ու Կարինե Պողոսյանը զրուցել են ապաքինվող զինծառայողների հետ, բժիշկներից հետաքրքրվել նրանց առողջական վիճակով, իրենց զորակցությունն են հայտնել Հայրենիքի պաշտպանության ժամանակ իրենց հերոսաբար դրսևորած հայորդիների ծնողներին:

Այցելության ընթացքում Հայրենիքի սահմանների պաշտպանության գործում ցուցաբերած անձնական խիզախության և նվիրումի, կյանքին սպառնացող վտանգի պայմաններում ծառայողական պարտքը պատշաճ կատարելու համար ՀՀ նախագահ Սերժ Սարգսյանի հրամանագրով Արիության մեդալով պարգևատրված շարքային Նորայր Միքայելի Քամալյանին հանձնվեց պետական բարձր պարգևը: Հոսպիտալում ապաքինվող զինծառայողներին ԱԺ պատգամավորները հանձնեցին նաև անվանական ժամացույցներ:

http://www.haynews.am/hy/1407259352

<Ազգային հպարտություն> ծրագիր ՀՀ դպրոցներում

Հուլիսի 4-ին ավարտվեց ՀՀ Մշակույթի նախարարության աջակցությամբ «Կրթություն առանց սահմանի» հասարակական կազմակերպության և «Դպրոց-կենտրոնների միություն» իրավաբանական անձանց միության հետ համատեղ իրականացված «Ազգային հպարտություն» ծրագիրը, որի նպատակն էր նպաստել դեռահասների շրջանում ազգային արժեհամակարգի զարգացմանն ու հայրենասիրական ոգու դաստիարակությանը, հայ մշակութային ժառանգության, պետական խորհրդանշանների արժևորմանն ու պահպանմանը:

Ծրագիրն ամփոփվեց ցուցահանդես մրցանակաբաշխությամբ, որը տեղի ունեցավ Երևանի Կոմիտասի անվան կամերային երաժշտության տանը: Միջոցառմանը ներկա էին ՀՀ ԱԺ փոխնախագահ Հերմինե Նաղդալյանը, ԱԺ պատգամավոր Ռուզաննա Մուրադյանը, ԱԺ պատգամավոր Կարինե Պողոսյանը, Մշակույթի փոխնախարար Արթուր Պողոսյանը, «Ռուսական Գրքի Տուն» մշակութային կենտրոնների ղեկավար Արարատ Ստեփանյանը, այլ հրավիրված անձինք, ՀՀ բոլոր մարզերից ծրագրին մասնակից դպրոցների մանկավարժներ, ծնողներ, աշակերտներ:

«Դպրոց-կենտրոնների միություն» իրավաբանական անձանց միության նախագահ Ռուզաննա Մուրադյանը շնորհակալություն հայտնեց ՀՀ բոլոր մարզերի մասնակից դպրոցներին` նշելով, որ շատ կարևոր է ազգային մշակույթի արժևորումն ու գնահատումը սերմանել հատկապես դեռահասների շրջանում, որոնց մոտ արժեքային համակարգը դեռ ձևավորման փուլում է: <Այսօր յուրաքանչյուր հայ պետք է գիտակցի, որ «Ես հպարտ եմ, որ…» կարգախոսով հայ մշակույթի, հայի ինքնության պահպանումը, հայ հերոսական կերպարների ճանաչումն ու արժևորումը, արժեքային համակարգի ամրապնդումը պետք է դառնա յուրաքանչյուր հայ երիտասարդի կյանքի հիմնական ու նվիրական կոչումը>, նշեց Ռուզաննա Մուրադյանը: 

Ողջույնի խոսքով հանդես եկավ ԱԺ փոխնախագահ, ՀՀԿ Կանանց խորհրդի նախագահ Հերմինե Նաղդալյանը, ով կարևորեց «Ազգային հպարտություն» ծրագրի գաղափարը, ինչպես նաև նրա շարունականությունն ու զարգացումը ՀՀ դպրոցներում նոր ուղղություններով` հանձնելով խրախուսական մրցանակներ ակտիվ մասնակցություն ցուցաբերած դպրոցներին: 

Քվեարկության արդյունքում ընտրված առավելագույն ձայներ հավաքած 36 լավագույն պաստառներ ներկայացնող դպրոցները պարգևատրվեցին արժեքավոր մրցանակներով և պատվոգրերով, որոնք հանձնեց ՀՀ Մշակույթի փոխնախարար Արթուր Պողոսյանը:

Մասնակից դպրոցներին խրախուսական մրցանակներ հանձնեցին նաև ՀՀ ԿԳ նախարարությունը` ի դեմս հանրակրթության վարչության պետ Նարինե Հովհաննիսյանի, «Ռուսական Գրքի Տուն» մշակութային կենտրոնների ղեկավար Արարատ Ստեփանյանը: 

Միջոցառումը եզրափակվեց համերգային ծրագրով:

12-ամյա պարտադիր կրթությունը նաեւ սոցիալակա՞ն խնդիր է լուծում

«Նոր համակարգին անցումը հնարավորություն կտա նաև սոցիալապես անապահով խավի երեխաներին անվճար մասնագիտական կրթություն ստանալ, որը այսօր կրթության զարգացման գերակա ուղղություններից է»,- Aravot.am-ի հետ զրույցում կարծիք հայտնեց ՀՀԿ-ական պատգամավոր, նախկինում դպրոցի տնօրեն Ռուզաննա Մուրադյանն՝ անդրադառնալով «Կրթության մասին» եւ «Հանրակրթության մասին» ՀՀ օրենքներում փոփոխություններ ու լրացումներ կատարելու մասին, արտահերթ կարգով խորհրդարանի քննարկմանը ներկայացրած կառավարության նախաձեռնությանը: Նախագծերն ընդունվեցին առաջին ընթերցմամբ: Հիշեցնենք, պետության կողմից երաշխավորված նվազագույն իննամյա կրթությունից անցում երաշխավորված անվճար տասներկուամյա կրթության, ներառյալ՝ մասնագիտական կրթությանը, ներառված էր նաեւ նախագահի նախընտրական ծրագրում: ՀՀԿ-ական պատգամավորը կարծում է, որ դա միտված է լուծելու մի քանի խնդիր, բայց նախեւառաջ բարձրացնելու է հասարակության կրթվածության մակարդակը, որն էլ իր հերթին, պատգամավորի համոզմամբ, ուղղակիորեն նպաստում է սոցիալական վիճակի բարելավմանը: «Գաղտնիք չէ, որ 9-րդ դասարանի աշակերտը դեռևս այդքան հասուն տարիքում չէ, որ գիտակցի իր կրթության շարունակականության կարևորությունը, և հիմնականում, որպես կանոն, հասուն տարիքում է, որ նա վերաարժևորում է իր կրթության նկատմամբ իր վերաբերմունքն ու սկսում մեղադրել ծնողներին: Երեխայի սովորելը ոչ միայն երեխայի իրավունքն է, այլև ծնողի պարտավորությունն է: Պատանեկության շեմը գիտակից հաղթահարելու համար այս նախագծով պետությունն էլ է իր վրա պարտավորություն վերցնում՝ որպես յուրաքանչյուր դեռահասի կրթության ապահովման երաշխիք՝ հնարավորություն ընձեռելով ստանալ նաև նախնական մասնագիտական կրթություն: Այսօր գաղտնիք չէ, որ բանվորների, վարորդների, փականագործների, խառատների, մեխանիկների, որակյալ արհեստագործների մեծ պահանջարկ կա, և 12 ամյա պարտադիր կրթության անցումը կարող է լուծել նաև այս խնդիրը՝ առավելապես շեշտը դնելով մասնագիտական կրթության ձեռքբերման վրա: Թեպետ մեզ համար էլ է մտահոգիչ, թե ինչպես կարելի է 18 ամյա երեխային բերել դպրոց, և այդ ուղղությամբ անհրաժեշտ է ստեղծել մոտիվացիա և մշակել հստակ ծրագրեր: Ինչպես նախկինում էր, որ պարտադիր ուսումնառությունից դուրս մնացած յուրաքանչյուր երեխա հայտնվում էր ուշադրության կենտրոնում, այնպես էլ այս ծրագիրը հնարավորություն կտա լրացնելու այդ բացը, և յուրաքանչյուր սովորող կստանա համապատասխան կրթություն նախնական ուսումնական հաստատություններում կամ միջնակարգ և ավագ դպրոցներում»,- ասաց Ռուզաննա Մուրադյանը: Նախագծի քննարկումների ժամանակ ընդդիմադիր պատգամավորները մտահոգություններ հայտնեցին մարզերում սովորող աշակերտների հետ կապված: Ինչո՞վ է նրանց շրջանցում այս նախագիծը: Քննադատության ենթարկվեց կրկնուսույցների ինստիտուտը, ինչպես նաեւ, տեսակետ հնչեց, որ ընդունելության քննություններում ավարտական ատեստատը հաշվի առնելով կարող է վերականգնել այդ փաստաթղթի ձեւական լինելը եւ լրացուցիչ կոռուպցիայի առիթ տալ՝ Aravot.am-ի հարցերին ի պատասխան ՀՀԿ-ական պատգամավորը նկատեց, որ ավագ դպրոցների ստեղծումը միտված էր հենց կրկնուսույցների ինստիտուտի վերացմանը, և կրկնուսույցների դեմ պայքարի լավագույն ճանապարհը ավագ դպրոցների կայացումն ու զարգացումն է: «Ավագ դպրոցի նպատակն է, որպեսզի 3 տարիների ընթացքում համապատասխան հոսքում սովորողին մատուցի մասնագիտական կրթության համար այն ակադեմիական գիտելիքների հիմունքները, որը նրան անհրաժեշտ է ինչպես բուհ ընդունվելու, այնպես էլ հետագա մասնագիտական գիտելիքները խորացնելու համար:Բացի այդ, ավագ դպրոցում ձևավորված կրթական միջավայրը նպաստում է ոչ միայն գիտելիքների ձեռքբերմանը, այլև սովորողի մոտ սոցիալական հմտությունների ձևավորմանն ու զարգացմանը, ինչը բնականաբար, չի կարող ապահովել կրկնուսույցի ինստիտուտը: Յուրաքանչյուր խնդրի լուծման համար ՝ կապված և մարզերում սովորողների համար, և կոռուպցիոն ռիսկերը նվազեցնելու համար անհրաժեշտ է հստակ մշակված ծրագիր:Կարծում եմ, որ ընդունելության քննություններում ավարտական ատեստատը հաշվի առնելը կնպաստի սովորողների առաջադիմության և դպրոցի հեղինակության բարձրացմանը»,- ասաց մեր զրուցակիցը: ՀՀԿ-ական պատգամավորը կարծում է, որ կառավարության կողմից ներկայացված ծրագիրը առաջարկում է կրթության մի շարք հիմնախնդիրների լուծումներ. «Ծրագրում կրթության որակի բարելավման նպատակով դրված է կրթակարգը և չափորոշիչները, ծրագրերը և դասագրքերը վերանայելու և բարելավելու հարցը:Հուսով ենք, որ դրանք կենթարկվեն բովանդակային և կառուցվածքային փոփոխությունների` հաշվի առնելով աշակերտների, ծնողների և մանկավարժների կողմից ներկայացված մի շարք պահանջներ»: Նրա համոզմամբ, կարիք կա բեռնաթափել չափորոշիչները, ծրագրերը, դասագրքերն ավելի մատչելի, հետաքրքիր, գրավիչ և ինտերակտիվ դարձնել` ապահովելով փոխգործուն համագործակցություն և երկխոսություն` խթանելով սովորողների սովորելու ցանկությունը, նպաստելով նրանց մտածողության զարգացմանը. «Ծրագրում ներառված մի շարք դրույթներ, որոնցից են ուսուցիչների, ուսումնական հաստատության վարչական անձնակազմի շարունակական վերապատրաստումների և նրանց մասնագիտական կատարելագործմանն ուղղված ծրագրերի իրականացումը` հենված մասնագիտական կարիքների վրա, կնպաստեն կրթության որակի բարձրացմանը: Իսկ մշակութային հաստատությունների և դպրոցի միջև ուղիղ կապի ստեղծումն ու զարգացումը անմիջականորեն կնպաստի աշակերտների գեղագիտական դաստիարակությանը: Կառավարության այս նոր ծրագիրը ապահովում է ոլորտների առաջընթացը և իրատեսական է»: 

Ամբողջական հոդվածը կարող եք կարդալ այս հասցեով՝ http://www.aravot.am/2014/05/26/464119/ 

Մամուլի ասուլիս Ազգային ժողովում

Հունիսի 16-ին տեղի ունեցավ ՀՀ Ազգային ժողովի եւ Ռուսաստանի Դաշնության Դաշնային ժողովի միջեւ համագործակցության միջխորհրդարանական հանձնաժողովի համանախագահ Հերմինե Նաղդալյանի, հանձնաժողովի անդամներ Վարդան Այվազյանի, Լեւոն Մարտիրոսյանի, Ռուզաննա Մուրադյանի, Տաճատ Վարդապետյանի եւ Հայկ Բաբուխանյանի մամուլի ասուլիսը, որը վերաբերում էր Նիժնի Նովգորոդում գումարված միջխորհրդարանական հանձնաժողովի 24-րդ նիստի աշխատանքներին:

Հերմինե Նաղդալյանը տեղեկացրեց, որ օրակարգում ընդգրկված հիմնական հարցը վերաբերում էր ՀՀ-ում եւ ՌԴ-ում փոքր եւ միջին բիզնեսի առկա վիճակին ու զարգացման հեռանկարներին, ինչի մասին զեկուցումով հանդես են եկել Հայաստանի եւ Ռուսաստանի էկոնոմիկայի նախարարների տեղակալները եւ ներկայացրել այդ ոլորտներում առկա խնդիրներն ու տնտեսական կապերի ամրապնդման հնարավորությունները: Տիկին Նաղդալյանի գնահատմամբ՝ Եվրասիական գործընթացներին ակտիվ մասնակցություն ունենալու մասին Հայաստանի որոշումից հետո տնտեսական բաղադրիչը երկու երկրների հարաբերություններում ավելի ու ավելի է կարեւորվում: Այս ոլորտի օրենսդրության եւ ընդհանուր տնտեսական դաշտի բարելավման նպատակով որոշվել է ստեղծել աշխատանքային խումբ, որը հաջորդ նիստին հանդես կգա առաջարկներով: Նիստի 2-րդ հարցը տեղեկատվական բնույթ է ունեցել եւ վերաբերել է «Հարավկովկասյան երկաթուղի» ՓԲԸ-ի կատարած աշխատանքների վերլուծությանը:

Հերմինե Նաղդալյանն ասաց, որ աշնանը Երեւանում տեղի ունենալիք հաջորդ նիստի օրակարգում կընդգրկվի Մաքսային միությունում եւ Եվրասիական տնտեսական միությունում Հայաստանի եւ Ռուսաստանի համագործակցության զարգացման հեռանկարների վերաբերյալ հարցը: Նա նկատեց, որ միջխորհրդարանական հանձնաժողովի նիստերում վերջին տարիներին ավելի ու ավելի է կարեւորվում սոցիալ-տնտեսական բաղադրիչը, եւ այդ ոլորտում համագործակցության անհրաժեշտության խնդիրը դառնում Է առանցքային:

Միջխորհրդարանական հանձնաժողովի անդամ հայ պատգամավորները գոհունակությամբ արձանագրեցին, որ հանձնաժողովի աշխատանքները աստիճանաբար ավելի նպատակային են դառնում, իսկ նիստերում քննարկվող հարցերը պահանջում են առարկայական կոնկրետ լուծումներ:

ԱԺ պատգամավորները պատասխանեցին նաեւ լրագրողների հարցերին: 

ՀՀ ԱԺ և ՌԴ Դաշնային ժողովի 24-րդ նստաշրջան

ՌԴ Դաշնային խորհրդի եւ ՀՀ ԱԺ համագործակցության հարցերով միջխորհրդարանական հանձնաժողովի 24-րդ նստաշրջան Նիժնի Նովգորոդում, Հունիսի 4-7

ՀՀ ԱԺ և ՌԴ Դաշնային ժողովի 24-րդ նստաշրջան

ՌԴ Դաշնային խորհրդի եւ ՀՀ ԱԺ համագործակցության հարցերով միջխորհրդարանական հանձնաժողովի 24-րդ նստաշրջան Նիժնի Նովգորոդում, Հունիսի 4-7