Առաջիկայում կայանալիք
ավագանու ընտրությունների հետ կապված` Aysor.am-ը զրուցեց ԱԺ ՀՀԿ խմբակցության
պատգամավոր Ռուզաննա Մուրադյանի հետ:
- Տիկին Մուրադյան,
Ինչո՞ւ ընտրողը պետք է ձայն տա ՀՀԿ-ի քաղաքապետի թեկնածուին այն դեպքում, երբ
բազմաթիվ խնդիրներ՝ տրանսպորտի, աղբահանության, կանաչապատ տարածքների, քաղաքի
համաչափ զարգացման, չեն լուծվել նախկին ՀՀԿ-ական ղեկավարների կողմից:
- Ընտրողը Երևանի
բնակիչն է, որի աչքի առաջ օր օրի ծաղկում է մայրաքաղաքը, դառնում ավելի բարեկարգ և
խնամված: Ակնհայտ է, որ Երևանը զարգանում է բոլոր ուղղություններով՝ քաղաքաշինական
նոր լուծումներ, բարեկարգվող և գունագեղ բակեր, ամենօրյա մաքրվող փողոցներ և մայթեր,
նոր ոճաբանական կահավորանք՝ նստարաններ, ծաղկամաններ, ցայտաղբյուրներ, արտաքին
լուսավորության նոր լուծումներ, համալրվող այգիներ, կանաչ տարածքներ՝ այսպիսով
դառնալով բնակչի և հյուրերի համար հարմարավետ քաղաք: Հատկապես ինձ շատ է
ուրախացնում այն փաստը, որ քաղաքը զարգանում է համաչափ, և ներդրումներն ուղղվում
են ամբողջ քաղաքին և, առաջին հերթին՝ ծայրամասային համարվող վարչական միավորներին:
Ինչպես կարելի է չնկատել, որ վերջին տարիներին Երևանի կանաչապատման և
բնապահպանական խնդիրները քաղաքի կառավարման մարմինների կողմից շատ են կարևորվում,
ինչի արդյունքում մեր աչքի առաջ Երևանում օրեցօր ավելանում են կանաչապատման,
ծաղկապատման և ծառապատման ծավալները: Ուրախությամբ պետք է նշենք, որ կանաչապատումը
ինքնանպատակ չի կատարվում, այլ տրվում են գեղարվեստական լուծումներ: Այս ծրագրից
նույնպես անմասն չեն մնում Երևանի ծայրամասային վարչական շրջանները, և այս
ուղղությամբ էլ նկատելի է քաղաքի համաչափ զարգացման մոտեցումը: Շատ կարևոր է, որ
քաղաքային իշխանությունների ուշադրությունից դուրս չեն մնացել շենքերի բակերի
բարեկարգումը, խաղահրապարակների վերականգնումը և նորերի ստեղծումը: Բարեկարգվում
են բակային տարածքները. ասֆալտապատվում են, կահավորվում են, կանաչապատվում են,
վերակառուցվում են ցայտաղբյուրները՝ դառնալով բնակիչների համար հաճելի հանգստի և
զբոսանքի գոտիներ: Անթաքույց է ծնողների ուրախությունը, երբ իրենց շենքերի
բակերում բացվում են նոր խաղահրապարակներ, հատկապես ծայրամասերում, որը շատ լավ
հնարավորություն է ծնողների համար իրենց բնակավայրերին մոտ, առանց կենտրոն
հասնելու, կազմակերպել իրենց երեխաների համար հետաքրքիր զբաղվածություն և ժամանց:
Ինչ վերաբերում է տրանսպորտին,
ապա պետք է նշեմ, որ շատ կարևոր է երթևեկության կանոնակարգումը, որի լուծմանը
նպաստում է մայրաքաղաքի երթուղիներում վերջին տարիներին հայտնված միջին և մեծ
ուղևորատարողության ավտոբուսները, որոնք կնպաստեն երթուղիների ծանրաբեռնվածության
պակասեցմանը, քաղաքի փողոցների և մայրուղիների բեռնաթափմանը: Կարծում եմ, որ
քաղաքացիները կգնահատեն արված աշխատանքը և հնարավորություն կտան սկսած գործերը
հասցնել իրենց տրամաբանական ավարտին:
- Որո՞նք են
մայրաքաղաքի զարգացման հիմնական խոչընդոտները և ի՞նչ ձևով է դրա լուծումը տեսնում
ՀՀԿ-ն:
- Ներկայումս,
քաղաքաշինական նոր զարգացումների ճանապարհին, կարևոր եմ համարում, որպեսզի
չկորցնենք հին Երևանի կոլորիտը, պահպանենք պատմամշակութային արժեք ունեցող շենքերի
ու շինությունների տեսքը: Հարմարավետ Երևան ունենալու ծրագրերում պետք է կարևորել
թեքահարթակների ավելացումը բոլոր անհրաժեշտ վայրերում հենաշարժողական
դժվարություններ ունեցող թե' մեր քաղաքացիների, և թե' հյուրերի համար հնարավորինս
մատչելի պայմաններ ապահովելու նպատակով:
Վերը նշված խնդիրների
լուծմանը նպաստելու համար, անհրաժեշտ է ունենալ հին Երևանի նախագիծ, ինչպես նաև
օրենք Փոքր Կենտրոնի մասին: Կարծում եմ, որ մեր մայրաքաղաքի զարգացումն այսօր
ակնհայտ է և անժխտելի: Եվ ես վստահ եմ, որ մենք միասին կառուցելու ենք ավելի լավ
Երևան, քանի որ մենք արդեն ավելի լավ Երևան ունենալու ճանապարհին ենք:
01.04.2013, 16:26
Նյութի աղբյուրը` Aysor.am
No comments:
Post a Comment